كتاب عبق الماضي بعيون الحاضر

فقرة مقتبسة من  عبق الماضي بعيون الحاضر

محبوبة زرصتها وجعتها باش تمشي للطبيب تڨلّعها وترجع للمحطة. جنات باش تشري ثلاثة جراري و4 غلافات مخاد وتروّح. الفاهمة هازّة ڨفة لدار ولدها. وتعرضها مرت ولدها جليلة وتڨلّها مرحبا مرحبا عمتي الفاهمة. وينك لاباس والله الصغار توحشوك ويسألوا عليك. تمد الفاهمة الڨفة لجليلة وتڨلّها رد بالك هاني فيها زوز دجاجات عربي مذبوحين ومريشين. و 5 حيار عظام. وكيلو لوز مقلي وڨول عمتي خايبة. يجي ياسين وأختو ياسمين لجدتهم الفاهمة. تحمّلهم وتبدى تبكي وتبوس فيهم وتڨلّهم. ها ذرّ ها ياسمين بنيتي ها ياسين وليدي والله إستاحشتكم. كي يروّح باباكم عمّار من الخدمة ڨولولوا نمشوا نطلّوا على جدّة. الفاهمة كي تجي مروّحة تڨلّها مرت ولدها آعمتي هاني حطيتلك روبة وشلاكة في الڨفّة إن شاء الله يعجبوك. والفاهمة كي توصل لدارها تحل الڨفّة وتجبد الشلاكة والروبة وتقيسهم وتبدى تسب في مرت ولدها وتڨول ملّا هاملة. حاطتلي شلاكة ضريفة. وروبة ضيڨة من  الأكتاف. ليه نا طفلة صغيرة عاطيتني روبة معبية بالنوّار الأصفر.

جنّات بعد ما تشري الجراري ولمخاد وكي تروّح تشلق أنهم عڨروها في صطوشها. وتبدى تدعي وتنوّح وتڨول حسبي الله ونعم الوكيل فيك يا إلّي شويتني. برّا يوريني فيك عجايب قدرتو يجعلها في راسك . ويجعلك وين تشب ما تربح. توكل ماتشبع. تشهڨ ما تلحڨ. عڨتني الله لا تربحك. برّا بڨلة ونڨطة وجوع وڨص ضلوع. برّا شربة سم وسڨية وسڨساڨ وملح الأسواڨ. عرّيتني الله يعرّيك. برّا كسرة وعسرة وعصرة. طيحة وفضيحة يجعلك كالرّيح ما تستريح. برّا ومايمكنك جن حارڨ مارڨ وطريحة بسبعة مطارڨ. يجعلك شارڨ غارڨ .حليييلي عرّوني سرقوني لا ما خلّولي. إلّي سرقلي صطوشي يجعلو في صحراء ضايع في نهار أرڨط وعفريت مبرڨط. هيّا عاد إه.


عم حميدة طريقو باين. باش يمشي يعمل تحليلة ويتعدّى للمعتمدية.عندو مطلب للحج يتفڨّدو. يطل على عون الاستقبال ويڨلّو بربي جتش قرعة الحذّاذ. ما يفهموش العون ويڨلّو آش ڨلت آبابا والله لا فهمتك. يڨلّو عم حميدة الحذّاذ الحذّاذ وليدي ثمش حاجة قبلوش مطالبهم. يڨلّو العون آه بابا فهمتك والله مازالو ياحاج إن شاء الله ربي يسهّل. يخرج عم حميدة من المعتمدية و يتعدّى لولد خوه يخدم في إدارة الطفولة. يزيد يوصّيه على المطلب. ولد خوه هذا إسمو الكامل. شر ماخلق ربي ديما بالعو. خمسطاش سنا لتالي وعد زميلتو باش يعرّس بيها. عملتلو قرض خذا بيه كرهبة وهرب عليها. جاب ربّي زميلتو لڨفت روحها وعرّست. وتو بنتها في الكولاج. عم حميدة يڨول للكامل آالكامل وليدي عسّلي على مطلب الحج واحرصلي عليه. ماك ولد خويا الباهي. عم حميدة وين يمشي لسي الكامل ولد خوه يوصّيه على المطلب. والكامل يقلّو أعطيني عشرة لاف حق تنمبري نكمّلوه لأوراق المطلب