كتاب مراوحـات بيـن الهـزل والجـد Livre de Sghaier Hajlaoui

الهادي ديما يوصّي في سعدية. يڨلّها بعد ما تعلف البڨرة بعّدوا من ڨدامها المعلف. باش رباطها ما يتلواش عليه. وزيد لو كان تعفس فيه تو تڨعرو.

هي هي والبنات نسوا المعلف بجنب البڨرة. وعفست فيه وتكب العلف في التراب. والهادي طلعلو الدم وتغشش على سعدية. ومن كلمة لكلمة. لوّح عليها الشلاكة. ماجتش فيها. هربت عليه وڨالتلو ماضربنيش بابا لحمر تو تضربني انت الهادي الدعثار. وبدا هو يجري وراها. وبالصدفة ولدو نجيب مكفرج دارو جديد وباش يصبّها. جبد منها سلباحة ولحڨ في جرّتها. هي تجري وهو يجري. و عندهم جريوة كلاب تجري بيناتهم وتنبح وفي رڨبتها حبل. عفس عليه الهادي. بركت الجروة وطاح هو فوڨها. وسعدية شقّت الحرث. وتلفتتلو وقْتلو اڨعد خبطة تخبطك ودخلت للواد ولبدت. كي بطى عليها الراجل ولّت تڨلّع في الدڨفت والمثنان وأعواد العلجان. والهادي رجع للدار. وفي ثنيتو بقى يتفرّج على مركح الماء تحت الربطة. وڨال غدوة نعمل فيها سطور حرث مركح ماء هايل يجيب صابة فول

طلعت سعدية من الواد ما شافتوش. مشت ڨعدت في أطرف الماجن. و المطر صابّة والماجن حايز الماء وما عدّاش من الخرّاجة.

الماء عامل ڨفّة متاع ڨش وريحتو متغيّرة. لوحت فيه أعراف علجان باش تطياب ريحتو. وبقت تتفرّج على راجلها يشوع ويعرك وينڨرز على بناويتو. ويڨلّهم معلف شريتو بثمنية وعشرين دينار على كيف كيفو. تڨول كان نسقي فيه الكسكسي ونوكل. عفست فيه البڨرة عوجاتو. وبنتو زهرة ڨالتلو والله بعّدناه عليها. آما هي جبداتو بخشمها
ڨعد الهادي يڨنڨن على بناويتو. وكي بات حسّو نادت سعدية على بناتها وڨالتلهم أُبيكم وين ڨلب وجهو. ڨالولها حلّس على البهيمة ومشى للحانوت. ڨالتلهم أيّا باهي لارجع. عزا فيه وفي راسو ركبتي وجعتني. عفست في الحرث تڨلبت رجلي ڨريب يكسرهالي. أبببببببب مسلاني. تحيرتلي الملصة. أمسدوني خنّمرڨد قبل ما يجي باباكم